Articles By Rizwan Uddin Farooqui

رضوان الدین فاروقی ۲۴ اکتوبر ۱۹۹۲ کو مدھیہ پریش کے تاریخی شہر سرونج میں پیدا ہوئے۔ وہ سرونج کے اس خانوادے سے تعلق رکھتے ہیں جو علم و ادب اور فہم و فراست میں کئی نسلوں سے ممتاز و مکرم رہا ہے۔ان کے دادا نجیب الدین فاروقی مرحوم مشہور وکیل ہی نہیں صاحب بصیرت بھی تھے۔ان ہی کے بیٹے محب الدین فاروقی،صاحب علم اور صاحب ادراک تھے۔ علم سے رغبت نے انھیں کتابوں سے محبت کرنا سکھایا تھا۔ انھوں نے بقول شان فخری کتابوں پر اتنا ضائع کیا کہ اگر وہ پس انداز کرتے تو شہر کے بڑے صاحب جائداد ہوتے۔علم سے یہ رغبت اور یہ دیوانگی رضوان فاروقی کو بھی وراثت میں ملی ورنہ میکینکل برانچ سے بی ای کرنے کے بعد اردو ادب کی طرف راغب ہونا یقیناً بزرگوں کی میراث کی حفاظت ہے۔ انجینئرنگ مکمل کرنے کے بعد آپ معروف آٹوموبائل کمپنی مہندرا سے وابستہ ہوگئے اور چھ سال تک وہیں اپنی خدمات انجام دیں مگر اردو کی محبت انھیں اردو کے میدان میں لے آئی۔ آپ فی الوقت مدھیہ پردیش اردو اکادمی میں عارضی طور پر سوشل میڈیا مینیجر اور وہاں سے نکلنے والے رسالے سہ ماہی تمثیل کی ادارت سے وابستہ ہیں اور اثبات پبلیکیشنز میں بھی بطور سوشل میڈیا ایگزیکیٹواپنی خدمات انجام دے رہے ہیں۔ آپ کے مضامین ملک کے معیاری ادبی رسائل و جرائد میں پابندی سے شائع ہوتے ہیں۔ آپ کو مدھیہ پردیش اردو اکادمی کی جانب سے بطور صوبائی ہیڈ کوارٹر اپنی خدمات انجام دینے کے لیے نوازا جا چکا ہے اور بزم حامد حسن شاد کی جانب سے نوجوانوں میں اردو کے فروغ کے لیے حامد حسن شاد ایوارڈ ۲۰۱۸ سے نوازا جا چکا ہے۔